ភ្នំពេញ៖ លោកទេសរដ្ឋមន្រ្តី ឱម យ៉ិនទៀង ប្រធានអង្គភាពប្រឆាំងអំពើពុករលួយ (ACU) បានប្រាប់ ឱ្យដឹងនៅព្រលប់ថ្ងៃទី០៥ ខែសីហា ឆ្នាំ២០១៦នេះថា ACU បានសម្រេចឃាត់ខ្លួន ក្រឡាបញ្ជីតុលាការកំពូល១រូបហើយ នៅល្ងាចថ្ងៃសុក្រនេះ ពាក់ព័ន្ធនឹងករណីពុករលួយ។

លោកថា អង្គភាពរបស់លោក នឹងបញ្ជូនមន្រ្តីតុលាការរូបនេះ ទៅកាន់សាលាដំបូងរាជធានីភ្នំពេញ នៅម៉ោង៤រសៀល ថ្ងៃអាទិត្យខាងមុខ។

ទោះជាយ៉ាងណា លោក ឱម យ៉ិនទៀង មិនបានបញ្ជាក់លម្អិតអំពីឈ្មោះ និងរឿងរ៉ាវពុករលួយ របស់ក្រឡាបញ្ជី នោះនៅឡើយទេ។ ប៉ុន្តែបើតាមមន្រ្តីជាន់ខ្ពស់តុលាការ​កំពូលមួយរូបសុំមិន​បញ្ចេញឈ្មោះ​បានឱ្យដឹងថា មន្រ្តីក្រឡាបញ្ជី ដែលអង្គភាពប្រឆាំងអំពើពុករលួយឃាត់ខ្លួននោះ មានឈ្មោះ វ៉ាត ពិសិដ្ឋ ដែលទើបនឹងផ្លាស់ពីខេត្តប៉ៃលិន មកកាន់ការនៅតុលាការកំពូល៕